مسلسل حقوق تائهة (02) حقوق الملكية الفكرية / حق التعبير

مسلسل حقوق تائهة ينشر على حلقات تباعاً على مدونون من أجل حقوق الإنسان

لقراءة الحلقات السابقة

موضوع الحلقة : حقوق الملكية الفكرية  / حق التعبير

كتبها : عربييي

اخرجها : MALAK + عربييي + جهـــاد

من زمان وانا وصغير كان نفسي ادخل غرافيك ديزاين

بس ابوي ما رضي وحكالي بدك تدرس هندسة ...

يا حج يهديك يرضيك ...

ما رضي ..

اختارلي ادرس هندسة ميكاترونيكس مع انو انا مش شاطر بالكهربا بالمرة

امتحان سيركت!!!!

طبعا هالامتحان زي امتحانات التوجيهي ...

مصيري حياة او موت ( يا بتغني انا عايش يا بتغني ومش عايش ) ...

من لما اشوف موعد هالامتحان على لوحة الاعلانات بتكركب وبحسب لهاليوم الف حساب ( يعني مصاريف النوم خارج البيت )...

اجا اليوم الموعود وانا لسة مش دارس ( كلها خمس دقايق وبختم )

على اساس ( نيرد انا ) ...

نيرد : كلمة يستخدمها سكان الحسين وجر للتعبير عن الذكاء الشديد لدى الشخص ....

احنا بنستخدم كلمة ( فلطح )كالعادة رحت عالجامعة الساعة 8 ولسة امتحاني عال6 مساءً اول محاضرة دكتور واقع من مكوك فضائي جاي اعارة من الاردنية وسايق علينا انو ( فلتة ) بكون يسولف بالانجليزي

وكل شوي احرجو انا ( استاذ متأكد من لفظ كلمة **** طب كلمة **** هيك بتنلفظ )

وجوابو المعتاد ( الدنيا صبح والواحد لسة مش صاحي ) ...

طبعا هالدكتور صادق وعمرو بحياتو ما بكذب الا بمحاضرتنا :( انا مرة يا شباب وانا ببريطانيا بزقت عالارض سجنوني شهرين ...

وبعديها لما رحت على امريكا اكمل دورات المحادثة كنت راكب بالطيارة والطيارة جديدة

وكانت بدها توقع لأنو الطيار مش عارف شو معنى الكلمة اللي بغرفة القيادة ... واجيت انا حكيتلو معناها ) ...

وهالشباب تهز بروسها وتحكي ماااااااااااااااااء ...

المحاضرة الثانية اجهزة الكترونية .... بصراحة ما بتذكر اشي بهالمحاضرة لأنو بكون زي الاطرش بالزفة وزي الاعمى بالسينما وزي الاخشم ببستان الورود وزي عديم الاحساس لما يحكي مع الخسة ....

بعد هيك في مختبر كيميا ....

احلى اشي بالمختبر انو الواحد بكون فاهم التجربة وعارف شو بدو يعمل بالزبط وما بغلط بالحسابات نهائياً ومجموعتو روعة ما شالله

والدكتورة دايما بتضحك وما بتقضيها صراخ بعدين بتحب الطواقي وما بنتناقر انا واياها كل مرة على الطاقية

ومدة المختبر ما بتملل ومش 3 ساعات ...

مش عارف ليش الناس بتكره مختبر الكيميا بجننبعد هيك بنطلق الى اخر محاضرة

وبقعد باخر كرسي وببلش شخاوير ..

ساعة ونص ضايل للامتحان ,

قلت لحالي خليني اروح ادرس بالمكتبة بلكي ربي فتحها بوجهي ونجحت ...

وانا ماشي لاقتني ( عشعش ) طبعا هي اسمها دلال بس اسم الدلع هاد الو مدلولات اخرى اول ما شافتني ( لوكت ) ثمها وطعجت خصرها و(سيّحت علي )

((( وينك انتا من السبح بدور عليك ومو ملائياك وموبايلك ( لويش مغلئ ) شو لهالدرجة بتحب المحادرات )))

ولسة بدي احكي انو عندي امتحان قامت سحبتني من قميصي عالكفتيريا وبتقوللي تع اعزمني ,

معاقة بتعرفش مين انا قلت يالله هي صحّلنا اكلة ببلاش ..

حكتلها شو بدك توكلي وشو تشربي اطلبي واختاري ...

والله ما قصرت مسكينة بالطلبات على اساس مفكرة عحسابي ...

وقبل موعد المحاسبة بثواني قال انخنقت بدي اروح عالحمام ....

وغليتها عالمكتبة رحت عالمكتبة والا هي فاضية " شو معقول فش حدا بدرس " تطلعت عالساعة والا هي خمسة الا عشرة

ركااااااااااااااااااااااااااض على قاعة الامتحان ...

( زبطت قعدة )

واجت الورقة وبلش الامتحان ...

السؤال الاول ( حلّق حول الاجابة الصحيحة )

(((السنة الماضية اجاني سؤال حلّق حول الاجابة الصحيحة ,

تركتو فاضي لأني مش عارف ولا جواب وكان الامتحان عربي ,

لما سلّم الدكتور الوراق بحكيلي ليش مش حال ولا دائرة يعني عالاقل ( شنصهم ) بحكيلو ليش الامتحان ضع دائرة ,

انتا كاتب ( حلّق ) )))المهم ما علينا ....

على علمي اني لما درست للامتحان كان باللغة الانجليزية بس ليش هون سنسكريتي

الدائرة الاولى : عليم الله انو الدكتورة مخلصة حبر الطابعة

وهي تكتب فيه لأ والاسخم انو السؤال 13 سطر والاجابات :a-1 b-4 c-5 d-2

الدائرة الثانية : المطلوب انو نحل على حسب ما هو موجود بالرسمة المجاورة بس اكتشفت انو ما في رسمة

ولازم الواحد يدبر حالو

الدائرة الثالثة : فيها رموز كثيييير وشغلات زي اللي بتكون الدكتورة تكتبهن عاللوح وانا زي اللوح ما بفهم شو علي

الدائرة الرابعة : اللي قهرني فيها انها ما فيها غير سطر واحد للسؤال وفيه رقم واحد , طيب كيف بدو يطلع معي اجابة زي الافرع مثلا زي :

20/30" +j15 cos(wt22/6.8+120" )

الدائرة الخامسة : لقيت الاجوبة كلها عادي الا الجواب C ممحي من سوء الطباعة رحت حطيت الدائرة عليه

السؤال الثاني :عبارة عن تحليل دائرة كهربائية مشان اطلع معادلتين ....

تطلعت عاللي جنبي لقيتو ناقل الرسمة على دفتر الاجابة , رحت نقلتها ...

لقيتو كاتب اشي ومخربش عليه رحت خبصتللي شوي وخربشت عليه ,

لقيتو كاتب معادلتين ما بعرف من وين جابهم ( نقلتهم نص حرفي ) وسلمت الورقة ,

بس اكتشفت بعد ما طلعت من الامتحان انو الشب اللي غشيت منو لسة كان يكتب بالسؤال ولسة ما بلّش يجاوب ...
((( عادي مرة مسحت لدكتورة اللوح صارت تحكيلي الك علامة عالامتحان الاول ... يعني بجيب 1 من 20 )))

ورد في الاعلان العالمي لحقوق الانسان:
المادة 19
لكل شخص الحق في حرية الرأي والتعبير، ويشمل هذا الحق حرية اعتناق الآراء دون أي تدخل، واستقاء الأنباء والأفكار وتلقيها وإذاعتها بأية وسيلة كانت دون تقيد بالحدود الجغرافية.