مسلسل حقوق تائهة : حقوق الملكية الفكرية / الاقتباس الممنوع

الكاتب : عرييبي

اخراج : عرييبي

موضوع الحلقة : الاقتباس الممنوع

حنيت للقرية اللي عشت فيها طفولتي ودراستي الابتدائية

وعشت احلى الايام اللي كنت فيها بين اهلي وصحابي ...

بتذكر لمّا كنت العب بخشومي وييجي ابوي يلطشني كف ويحكيلي (( مسّح ببلوزة اخوك بديش اشوف ايدك بخشمك ))

آآآآخ يرحم هديك الايام ...

كان لما الاكل ينحط عالارض الصحون تنزل فاضية ....

لأنو الايدين بتبلّش توكل والصحون بالجو ....

16 نفر على 4 صحون بس الحلو الواحد كان يقوم يحكي الحمد لله ...

يرحم ايامك يا جارتنا ...

كنت اطلع عالسطح مشان اطقس عليها ...

وهي تكيّف ,

تسحّل الاشار وتعمل حالها مش شايفتني ...

كانت جارتنا هي اللي اوحتني للكتابة لأني اول اشي بحياتي كتبتو بعينيها وكانت بيت الشعر التالي :

رمتني بجمال عينيها رصاصة ......

فقلت براسي هيك ,

فجائت الطلقة من هآنذلك الحاجب العريض المخمليّوو ......

غطّى على سحر العيون شبران

جمال عينيها وحواجبها اوحالي الكتابة ....

كنت اروح من المحرقة عالبيت بالليل وأضل اكتب واكتب واكتب لحد ما يطلع الصبح ...

بس يطلع الصبح اكتشف انو القلم اللي كنت اكتب فيه فاضي واشوف الورق يطلع ابيض

لما صار عمري 25 سنة الله فتحها علي ودبرت شغل برا القرية وطلعت عالمدينة ...

اشتغلت اولها بمطعم وكتبت شعر بحبات الفلافل ....

واشتغلت نجار وحفرت قصيدة على خزانة خشب ...

. اخر شي اشتغلتو مراسل بشركة صغيرة .,,,

سكرتيرة المدير كانت صحفية وحكتلها عن موهبتي بالكتابة وقبلت انها تنشرلي مقالة بزاوية اسمها " خفايا مندوب "

......جهزتلها مقالة وانتشرت بالجريدة .....

بس اللي ما توقعتو انو المقالة عملت اختلاف بالرأي العام وهالاشي سبب انها تنشهر وانشهر انا معها ...

طلبتني اكتر من جريدة انو اكتبلها مقالات حصرية الها

بس انا رفضت لأنو ما بحب انربط بأشي معين ولا بحب انحط تحت الامر الواقع ولا بحب حدا يمسكني من ايدي اللي بتوجعني ....

بيوم اتصلت بجريدة اعلن فيها انو مطلوب سيارة لأنو ربنا فتحها علي والحمد لله ....

وللصدفة اتفاجأ انو صاحب هالجريدة بعرفو وبعزّو ....

سولفنا شوي وحكينا اخبارنا لبعض واقترح علي اني اشتغل معاه بالجريدة ....

لأني بعزّو كتير ارتبطت معاه بالشغل

وساهمت معو انو تنتشر سمعة المجلة وتنشهر وكنت اكتب المقالات واعمل افكار بتساهم بالتشهير للجريدة .....

بس للاسف .....

كنت بشتغل مشان غيري يكب بالبحر ....

طبعا كون الشغل كان شراكة بيني وبين صاحب الجريدة بيطلعلو وكالة على مقالاتي ....

ولقيت انو بتصرف فيهم من غير علمي ( وليس اذني ) ...

حسيت وقتها اني مرة مطلقة وطلع لأبو الولد حق الحضانة .....

ابني رح يروح مني ....

انا بصراحة ما زعلت على المقالات اللي كتبتهم ولا زعلت لأنو هالجريدة فيها مقومات وقدرت تطلع بالعالي من جهد موظفيها ...

بس زعلت على حالي انو ما عملت شي يخليني استاهل كل هالمعاملة !!!

ما علينا .....

ورد في قانون الملكية الفكرية المادتين 4 و 6 ما يلي :

المادة 4

للمؤلف وحده الحق في تقرير نشر مصنفه وفي تعيين طريقة هذا النشر .

وله وحده الحق في استغلال منصبه مالياً بأي طريقة من طرق الاستغلال ولا يجوز لغيره مباشرة هذا الحق الا بإذن كتابي مسبق منه أو ممن يخلفه .

المادة 6

للمؤلف وحده الحق في أن ينسب إليه مصنفاً إلا إذا ورد ذكر المصنف عرضاً في ثنايا تقديم إذاعي أو تلفازي للأحداث الجارية .

وللمؤلف أو خلفه الخاص أو العام الحق في الاعتراض أو في منع أي حذف أو تغيير أو إضافة أو إجراء أي تعديل آخر على مصنفه دون إذنه .

ويستثنى من حكم الفقرة السابقة التعديل في ترجمة المصنف أو تحويره أو تطويره إلى صورة أخرى إلا إذا ترتب على ذلك مساس بسمعة المؤلف أو شرفه أو مكانته العلمية أو الفنية أو إخلال بمضمون المصنف وفي جميع الأحوال يجب التنويه بما تضمنته الترجمة أو التحوير أو التطوير من تعديل المصنف الأصلي .